هو انت صابر ولا راضى ؟! )
اسأل نفسك السؤال ده !
طب عارف اصلا ايه الفرق بين الرضا والصبر !؟
طب ايهم افضل واعلى منزلة الرضا أم الصبر !؟
بأسلوب بسيط جدا هقولك الفرق بينهم ,,
-لو كنت مبتلى ومهموم وحزين....يبقى انت صااابر بس !
-انما لو كنت فى عز همك بس قلبك مرتاح وشاعر أن هذا خير من عند الله الذى يعلم وأنت لا تعلم ,, يبقى انت كده راااضى !
سيدنا عمر بن الخطاب كان بيقول ..
(( اعلم ان الرضا هو خير الامور كلها ؛ فان لم تستطع ان ترضى فاصبر ))
هقولك قصة قصيرة توضحلك معنى الرضا
كان فيه صحابى اسمه عمران بن حصين ، كان قوى الجسم وكان دائم التنقل والترحال ، ربنا ابتلاه بمرض خلاه قعيد الفراش لمدة 20 سنه !!
تخيل 20 سنه مش عارف حتى يخدم نفسه !
فكانت الناس كل ما تدخل عليه تفتكر أمجاده وتبكى !
فكان بيقولهم : على اى شئ تبكون
؟!
هذا_شئ_أحبه_الله_فأحببته
!
:")
شوفت الجمال و الرضا والتسليم التام لامر الله !
السعادة فى الرضا ,, ارض بحالك انت احسن من ملايين والله !
للاسف أغلبنا مبقاش راضى ؛ بقى يصبر مع جزع !
او بمعنى اصح بيضحك على نفسه انه راضى ومن جواه بيقول ليييه ! اشمعنا انا !
لا اللى اتجوزت راضية وتقولك الجواز مسؤوليه وتعب
ولا اللى ماتجوزتش راضية وتقولك القطر فاتنى !
لا اللى عنده شغل وبيشتغل راضى وبيقولك الارهاق والتعب والمرمطة ومش برتاح ؛
ولا اللى مش لاقى شغل راضى وعايز يشتغل اى حاجة !
لا اللى متغرب عشان يشتغل ويكون مستقبله راضى ويقولك غربه ومرة ؛ ولا اللى ف بلده وسط_اهله راضى ولا حاسس بقيمة انه وسط اهله وهيموت ويسافر !
لا البيضا راضية ولا السمرا راضية لان الاتنين بيبصوا ع الاجمل منهم !
لا المريض راضى ولا السليم راضى لانه اصلا مش مدرك قيمة الصحة وان غيره بيلف ف المستشفيات !
لا اللى دخل كلية عادية راضى وبيقولك مستوايا الاجتماعى اقل وانا اتظلمت ؛ ولا اللى دخل طب وصيدلة راضى ويقولك مرتبى مايعيش حد عيشة كريمة وبتوع اقل كلية حياتهم أفضل منى
محدش_راضى عشان كده محدش_سعيد !
سيدنا محمد صل الله عليه وسلم
ليه حديث جميل أوى بيقول
( من أصبح منكم آمنا في سربه، معافى في جسده، عنده قوت يومه، فكأنما حيزت له الدنيا ).
حسنه الألباني
يعنى لو اول ما صحيت كده قعدت على سريرك وتأملت فى حالك دقيقة قبل ما تقوم ولقيت انك مش مريض وقادر تقوم على رجلك تخدم نفسك ؛ ومحدش مهددك مطمئن وملكش اعداء ينقضوا عليك ويفزعوا حياتك ؛ وعندك اللى يكفيك من اكل وشرب يومك ده بس ....فكأنما حيزت لك الدنيا بأكملها
قال تعالى
"وما خلقت الجن والانس الا ليعبدون * ما أريد منهم من رزق وما أريد أن يطعمون * ان الله هو الرزاق ذو القوة المتين" .
"وفى السماء رزقكم وما توعدون".
ربنا تكفل برزقك ووعدك انه هيرزقك
..وفى الاخر انت الخسران لو مرضيتش .. لان الظروف اللى حواليك هتفضل هيا هيا ؛ فلو عيشتها راضى هتهووون كتير وهتكسب رضا الله ومعونته ومكافئته علي صبرك !
ولو اخترت انك تسخط وتحس انك من المعذبين فى الارض ؛ او تحس انك اكتر انسان مظلوم فى الدنيا ؛ فانت اللى اخترت تكدر حياتك بنفسك !
من_رضى_فله_الرضا_ومن_سخط_فله_السخط !ارضي_عشان_ربنا_يرضيك
الرئيسية 
من طرف 
المزاج
موضوع: هو انت صابر ولا راضي؟؟؟ 
