وقربنـاه نجيـا :)

أي القلوب صارت عليه أحوالك أي القلوب صار قلبك قلوبنا بقت عاملة
إزاي يا جماعة قلوبنا وهى بتسمع هذه الكلمات وهى خلقت عشان فيها هذه المعاني
إحنا قلنا القلب مستودع الإيمان ومحل نظر الرحمن
قلوبنا اتخلقت عشان يُوضع فيها حب ربنا سبحانه و تعالى

فيا ترى طلعت منها ذرة التسخط ببسلم الرضا ، يا ترى بقينا أكثر رضا عن الله تبارك وتعالى ؟؟

قلبك مستأنس ولا قلبك بعيد شارد مستوحش ؟!
أبو الأشهب السائح
والأثر فى الحلية
قال " بينما أنا في الطواف إذ بجويرية قد تعلقت بأستار الكعبة "
وأنا قاعد بطوف بصيت لقيت بنت صغيرة وماسكه في أستار الكعبة وتقول " يا وحشتي بعد الأنس يا ذُلي بعد العز يا فقري بعد الغنى "
فقال لها " مالكِ أفقدتي شيء "
مالك حصل حاجة ؟! حد خد منك حاجة ؟! ، فلوسك راحت ، أهلك مش لاقيهم حصلك إيه؟!
ليه بتقولي يا وحشتي بعد الأنس و يا ذلى بعد العز و يا فقرى بعد الغنى ؟!

قالت " لا ولكن كان لى قلب ففقدته "
قال " هذه مصيبتك !! "
هى دي أكبر حاجة بتقولي الكلام ده عشانها ، أنت فى الحالة دي عشان مش لاقيه قلبك
" قالت وأي مصيبة أعظم من فقد القلوب وانقطاعها عن المحبوب ؟! "

أي مصيبة أعظم من إنك ما تلاقيش قلبك وتلاقى قلبك مقطوع مش موصول بربك
أي مصيبة إن أنت ما تلاقيش في قلبك أحبك ربي
أي مصيبة أعظم من فقد القلوب وانقطاعها عن المحبوب

عارفين قصة أصحاب الجنة اللى ربنا سبحانه وتعالى ذكرها في سورة القلم أنا دايما لما الآيات دي أتأملها واتدبرها أقف مع معنى غير المعني الأساس اللى سيقت من أجله الآيات مش مسألة إن هم بخلوا عن الله تبارك وتعالى فقالوا خلاص مش حندي أي حد من الفقراء ولا المساكين أي شيء

أنا بقف عند لحظة الإحساس بالحرمان لما أصبحوا وذهبوا إلى البستان فبصوا لقوا البستان قد تحول إلى رماد كل الزرع فنى وهلك اللحظه دي لما يقولوا

" فَلَمَّا رَ‌أَوْهَا قَالُوا إِنَّا لَضَالُّونَ * بَلْ نَحْنُ مَحْرُ‌ومُونَ "

بحس إن الواحد لما تعدي عليه الآية دي يقول يا رب ما تحرمنى منك يا رب يارب ما تحرمني القرب منك يا رب ، يارب ما تحرمنى لذة وحلاوة الإيمان بك يا رب لما يبقى لينا قلب فى وقت من الأوقات بيحس ، كان في وقت من الأوقات بيحب وبعد كده القلب ده تاه و شرد وضل
بحس إن هو نفس الموقف وهم بيقولوا " إِنَّا لَضَالُّونَ "
توهنا ليه ؟!
"قَالَ أَوْسَطُهُمْ أَلَمْ أَقُلْ لَكُمْ لَوْلَا تُسَبِّحُونَ "

مش قولت لكم عليكوا إنكم ما تنسوش ربنا ، عليكم إنكم يبقى ربنا منكم على بال تسبحوه وتذكروه
عشان ما تهوش وعشان قلوبكم ما تشردش

هو ده المعنى اللى إحنا عايزينه النهاردة إزاي نطلع من حالة الوحشة دي ؟!
إزاي نوصل لمرحله الأنس ، إزاي أحس ، إزاي ألاقي قلبي

حديك النهاردة أول خطوة عملية للقرب فلما تقرب حتحس

أنت عارف مسألة القرب والبعد دي وعارفة لما تبقي في مكان بعيد وتبصي على مرمى بصرك آخر حاجة تشوفيها فتشوفيها بشكل ممكن ما يكونش هو ده الواقع ممكن تكون الصورة فيها شيء من الضبابية الصورة مش واضحة

إنما لما تقربي أوي الصورة تتضح الصورة تبقى واضحة تبقي قادرة إنك تعرفي توصفي اللي قدامك كويس وتفهمي الموضوع كويس
هو ده اللي أنا عايزكم تفهموه النهاردة ، النهاردة حنقرب ولما قلوبنا تتقرب حتستشعر وتطلع من حالة الوحشة

حنتقرب بإيه ؟!

حنتقرب بالمناجاة

اكتب معايا النهاردة

أول قاعده نجاتك ونجاتك الحقيقة إنك تلاقي قلبك نجاتك فى مناجاتك

لما ربنا سبحانه وتعالى يقول " إِلَّا آلَ لُوطٍ ۖ نَجَّيْنَاهُمْ بِسَحَرٍ‌ "

اشمعنى خرجوا في وقت السحر ؟!
أصل هو ده الوقت اللي لما تناجي فيها ربنا سبحانه وتعالى تكون قريب قوي منه
" أقرب ما يكون العبد فيه من ربه في جوف الليل المظلم كما يقول النبي صلى الله عليه وسلم أقرب ما يكون العبد من ربه وهو ساجد "

فلو بقيت ساجد وفي جوف الليل المظلم ودعوت بالدعوات اللي طالعة صافية وخالصة من قلبك حتقرب منه أوي وحتلاقي قلبك في اللحظة دي على حال غير الحال اللي أنت مستشعر فيه الحرمان من القرب من ربك

يا حبيب القلوب أين أحبائك ، يا أنيس المنقطعين أين طلابك
من الذي عاملك فلم يربح من الذي ألتجأ إليك فلم يربح من الذي وصل إلى بساط قربك واشتهى أن يبرح
قبل كده عشت الموقف ده إنك ترفع إيديك وتناجيه وتثني عليه وتطلب منه ويردك
و الله لو رزقت فى ساعتها الإخلاص والصدق هتلاقي قلبك هيقربك منه بس أنت لازم تبقى حاسس بالمعنى ده

لما يبقى الواحد من جواه الألم والحسرة إنه قلبه مقطوع عن ربنا لما تسمع النبي صلى الله عليه وسلم وهو بيوصف اللي مكانش على السنة
اللي بدل سنة النبي صلى الله عليه وسلم اللي غير سنة النبي محمد صلى الله عليه وسلم وتصوروا وهو بيجري عليه مشتهى إنه يحتضن النبي صلى الله عليه و سلم ، إنه يشرب من يديه الشريفة الشربة التي لا يظمأ بعدها أبدا يجري عليه صلى الله عليه وسلم
فيجد من يحول بينه وبين النبي صلى الله عليه و سلم
" ويقول بعدًا بعدًا سحقًا سحقًا لمن بدل بعدي وغيّر "

تبعد عنه لما النبي صلى الله عليه وسلم يرتقي درجات المنبر ويدعو فيقول بعُد
النبي صلى الله عليه وسلم يرتقي الدرجة الأولى فيقول آمين
آمين آمين و بعد كده يقول أتاني جبريل فيقول بعُد من أدرك والديه على الكبر فلم يدخلاه الجنة قل آمين فيقول النبي صلى الله عليه و سلم
آمين

قلب المحب لما يسمع بعُد دي يضطرب ، أبعد عنه اتحرم منه سبحانه وتعالى
" بعُد بعُد من أدرك رمضان فلم يغفر له فيه قل آمين آمين "

لما تحس بمرارها تلاقي نفسك بتقول لا مش حينفع أنا لازم اتقرب ، أنا لازم أدعي ربنا سبحانه وتعالى
بقلب يقظ بقلب صادق إنه يقربني منه وإنه ما يحرمنيش منه وإنه ما يحرمنيش من قربه لأنه القريب سبحانه وتعالى أقرب إلينا من حبل الوريد

يقولوا في معنى كمان لازم تحسه قوي عشان تحس بمعنى القرب ده تبقى خايف من البعد
النبي صلى الله عليه وسلم يقول فى الحديث الشريف إنه ليغن على قلبي "

ألاقي قلبي كده قافل شوية حاجة كده معكره الصفو في حاجة كده قابضة شوية في صدري
" إنه ليغن على قلبي "
أشعر بشيء يحجب قلبي " إنه ليغن على قلبى وإنى لاستغفر الله تعالى فى اليوم مائة مرة "

قالوا كان ليه قلب النبي صلى الله عليه و سلم كده قالوا عشان كان بيحس لما النبي صلى الله عليه و سلم وهو كل يوم فى ازدياد فالنهارده كان في الدرجة الخامسة بكره بقى فى الدرجة السادسة بعده بقى فى الدرجة السابعة فلما داق حلاوة الدرجة السادسة

قال يااااه أنا إزاى ما اجتهدتش أكتر عشان أنالها امبارح على إنه بيعمل اللى لا مفضول فيه بيعمل أعظم شئ النبي عليه الصلاة والسلام كل أعماله هكذا فاضله مفيهاش مفضول بس لما داق القرب بقى كده فقلب المحب دايما يخاف ينزل الدرجه بعد ما ذاق حلاوه القرب فى الخطوه يخاف يرجع منها فعشان كده دايما يبقى عايز يتقرب يبقى عايز يبقى اقرب ما يكون من حبيبه من ربه سبحانه وتعالى

شوفوا بقى المعنى اللى ربنا سبحانه و تعالى ساق فيه عنوان حلقتنا هذه و قال " وَقَرَّ‌بْنَاهُ نَجِيًّا "

ربنا وصف بيها سيدنا موسى اللى اتكلمنا عنه لما قلنا ربنا اختصه بانه قال
" وَأَلْقَيْتُ عَلَيْكَ مَحَبَّةً مِنِّي "

و الله بأغبطه و انت لازم تغبط سيدنا موسى

شوف كده لما تنزل عليك المحبه " وَأَلْقَيْتُ عَلَيْكَ مَحَبَّةً مِنِّي وَلِتُصْنَعَ عَلَىٰ عَيْنِي "

ربنا يقول " وَاصْطَنَعْتُكَ لِنَفْسِي " لما سيدنا موسى عاش المعانى العاليه العظيمه ديي
قلنا اشتاق فجرى لربنا فقال " وَعَجِلْتُ إِلَيْكَ رَ‌بِّ لِتَرْ‌ضَىٰ "

و اتفقنا إن ده يبقى شعار من شعارات المحبين اللى عايزين ينالوا أحبك ربى فى قلوبهم
لازم يبقى شعارهم " وَعَجِلْتُ إِلَيْكَ رَ‌بِّ لِتَرْ‌ضَىٰ "

لما اشتاق اوى و ربنا قاله " وَمَا أَعْجَلَكَ عَنْ قَوْمِكَ يَا مُوسَىٰ "
جريت و سبتهم ليه وراك قال " قَالَ هُمْ أُولَاءِ عَلَىٰ أَثَرِ‌ي وَعَجِلْتُ إِلَيْكَ رَ‌بِّ لِتَرْ‌ضَىٰ "

قوم إيه بقى وناس إيه دلوقتى أى حاجة أنا عندي استعداد إن أنا اضحى بيها بس أنت أنال القرب منك بس أنت ترضى

فلما يقبل سيدنا موسى على ربه ، ربنا يقول " وَاذْكُرْ‌ فِي الْكِتَابِ مُوسَىٰ ۚ إِنَّهُ كَانَ مُخْلَصًا "

" إِنَّهُ كَانَ مُخْلَصًا "
أى ربنا خلصه من كل شئ
من كل تعلق مذموم ، بقى قلبه خالص لله تبارك و تعالى خالص ومُخلص لله سبحانه و تعالى فى كل أعماله
" إِنَّهُ كَانَ مُخْلَصًا وَكَانَ رَ‌سُولًا نَبِيًّا "
" وَنَادَيْنَاهُ مِنْ جَانِبِ الطُّورِ‌ الْأَيْمَنِ "

استنانى بقى كده عشان الموقف ده حيتكرر مرتين دلوقتى وحتشوف المعنى الجميل ده فى حق سيدنا موسى وفى حق نبينا صلى الله عليه و سلم

اتخيل كده إن ربنا بينادي على سيدنا موسى أقبِل " وَنَادَيْنَاهُ مِنْ جَانِبِ الطُّورِ‌ الْأَيْمَنِ "
تعالى من هنا فيجرى سيدنا وهو فى منتهى الشوق وهو فى منتهى السعادة بالقرب من ربنا سبحانه وتعالى
" وَنَادَيْنَاهُ مِنْ جَانِبِ الطُّورِ‌ الْأَيْمَنِ وَقَرَّ‌بْنَاهُ نَجِيًّا "

أنت عارف السكه بتاعة ربنا سبحانه وتعالى
السكة دي تلاقى عايز توصفها لو قلنا إنها ألف خطوة أو قلنا إنها مائة خطوة آخر خطوات فيها آخر عشر خطوات فيها وأنت فى القرب أوى ما ينفعش تدخلها كده إلا بحالة معينة فكأن سيدنا موسى قطع التسعين خطوه وبقوا العشر خطوات دول عشان يقربهم كان لازم
يوفق للمعنى العالى ده

اللى هو إيه ؟!
اللى هو المناجاة
فقال ربنا سبحانه و تعالى " وَقَرَّ‌بْنَاهُ " أدنيناه أكتر ، جه خد المائة متر الأخيرة ، جه خد العشر خطوات الأخيره بإيه ؟!
بالمناجاة

لما ناجى الله ولما ربنا سبحانه وتعالى ألهمه الكلمات قرب وأدناه الله عز وجل منه

شوفتوا بقى القرب بيبقى فين ؟!

بــــالــــمـــــنــــاجـــــاة

جزاك الله خيرا
وأسال الله أن لايرد لك دعوة
ولا يحرمك من فضلة
وأن يحفظ أسرتك وأحبتك